भंडारा पत्रिका/ प्रतिनिधी गोंदिया : तालुक्यातील निलज येथे १७ मार्च रोजी चारचाकी वाहनाने आलेल्या ५ ते ६ अज्ञात इसमांनी एमएचबीजी ६५९७ क्रमांकाचा टिप्पर अडवून बळजबरीने चोरुन नेल्याची घटना घडली होती. याप्रकरणी संदिप मस्के यांच्या तक्रारीवरुन रावणवाडी पोलिसांनी गुन्हा दाखल केला होता. दरम्यान, पोलिस अधीक्षक निदेर्शानुसार रावणवाडी पोलिस व स्थानिक गुन्हे शाखा पोलिसांनी वेगवेगळ्या पथकाद्वारे तपास सुरु केला. तपासादरम्यान मिळालेल्या गोपनीय व तांत्रिक माहितीच्या आधारे पोलिसांनी हरिचंद्र देवीदास पटले रा.डोंगरला याला अटक केली.
चौकशीदरम्यान त्याने नितीन मंगलदास पटले (२४), दुर्योधन चैनलाल पटेल (२७) दोन्ही रा. डोंगरला व अब्दुल रशिद रज्जाक कुरेशी (४३, रा. येरली) यांच्या मदतीने गुन्हा केल्याची कबुली केली. पोलिसांनी चारही आरोपींना अटक केली असून त्यांच्याकडून चोरी गेलेला टिप्पर व गुन्ह्यात वापरलेले चारचाकी वाहन असा एकूण ३५लाखांचे वाहन जप्त केले. ही कारवाई स्थानिक गुन्हे शाखेचे सहायक पोलिस निरिक्षक विजय शिंदे, पोलिस उपनिरीक्षक जीवन पाटील, पोलिस हवालदार भुवनलाल देशमुख, महेश मेहर, तुलसीदास लुटे, इंद्रजीत बिसेन, सोमेंद्रसिंह तुरकर, दीक्षित दमाहे, प्रभाकर पालांदुरकर, संजय मारवाडे, धनंजय शेंडे, पोलिस शिपाई संतोष केदार, मुरली पांडे तसेच रावणवाडीचे ठाणेदार भुजबळ, सहायक पोलिस निरीक्षक अंबुरे, पोलिस हवालदार सुबोध बिसेन, गुलाब तुरकर, अरविंद चौधरी,रणजित बघेले, संजय चव्हाण, पोलिस शिपाई दुर्गेश टेभरे यांनी केली.
