भंडारा पत्रिका/तालुका प्रतिनिधी मोहाडी : स्वतंत्र विदर्भ राज्याच्या मागणीसाठी प्रखरपणे लढा देणारे विदर्भवादी व्यक्तिमत्व सुखदेव पात्रे यांचे ३ मे ला सकाळी १० वाजे दरम्यान निधन झाले. सुखदेव पात्रे हे विदर्भ राज्य आंदोलन समितीचे जिल्हा महासचिव होते. दि २८ एप्रिल २०२३ ला तुमसर करून मोहाडीकडे मोटरसायकलने येत असताना खरबी जवळ रानडुकराच्या हल्ल्यात ते गंभीर जखमी झाले होते. प्रथम ग्रामीण रुग्णालय मोहाडी, नंतर भंडारा व गंभीर स्थितीमुळे नागपूर येथील न्यूरान हॉस्पिटलमध्ये त्यांना दाखल करण्यात आले. त्याच ठिकाणी पात्रे यांनी शेवटचा श्वास घेतला. सुखदेव पात्रे हे विदर्भ राज्य आंदोलन समितीचे अतिशय सक्रिय पदाधिकारी होते.
स्वतंत्र विदर्भ राज्याच्या मागणीसाठी त्यांनी अनेक आंदोलन केली. विदर्भ राज्य आंदोलन समितीचे जिल्हा महासचिव सुखदेव पात्रे दि.२८ एप्रिलला काही कामानिमित्त तुमसरला गेले होते. सायंकाळी ४ वाजेदरम्यान मोटरसायकल क्रमांक एम एच३६एडी २०८५ प्लेटीना या दुचकीने परत येत असतांना रानडुकराने जबर धडक दिली. यामुळे पात्रे हे खाली कोसळले यात त्यांच्या डोक्याला गंभीर इजा झाली. सोबत असलेले मदन गडरिया यांना मात्र किरकोळ जखम झाली. पात्रे यांची स्थिती नाजूक असल्याने त्यांना नागपूर येथील रुग्णालयात दाखल करण्यात आले. नागपूर येथील न्यूरॉन हॉस्पिटलमध्ये उपचारा दरम्यान दि.३ मे ला सकाळी १० वाजेदरम्यान त्यांचा मृत्यू झाला. सुखदेव पात्रे यांच्या मागे दोन मुले, पत्नी, आई असा परिवार आहे. त्यांच्या निधनाने सर्वत्र हळहळ व्यक्त होत आहे.
सुखदेव पात्रे यांचा भ्रष्टाचार व अन्यायाच्या विरोधात सातत्याने लढा सुरु होता. मोहाडी नगरपंचायतच्या भोंगळ कारभारा विरोधातही नगर पंचायतीला त्यांनी चांगलेच धारेवर धरले होते. या विरोधात काही दिवसापूर्वी मटकी फोड आंदोलनकेले होते. शिवाय आमरण उपोषणाचा इशारा त्यांनी दिला होता. त्यांच्या जाण्याने मात्र जिल्हात विदर्भ राज्य आंदोलन समितीच्या लढ्यात निर्माण होणारी पोकळी भरणे अशक्य असल्याचे मत विदर्भ राज्य आंदोलन समिती जिल्हा सम्वयक विनोद बाभरे, तालुका अध्यक्ष, ज्ञानेन्द्र आगासे, शहर अध्यक्ष सदानंद देशमुख व पदधिका-यांनी व्यक्त केले.
कोयला रोको आंदोलनापूर्वी अपघात विदर्भ राज्य आंदोलन समिती च्या वतीने स्वतंत्र विदर्भ राज्यासाठी व वाढत्या वीज बिलाच्या निषेधार्थ दि.१ मे २०२३ महाराष्ट्रदिनी उमरेड ला कोयला रोको आंदोलन होणार होते. यात जिल्ह्यातून सुखदेव पात्रेसह विदर्भ राज्य आंदोलन समितीचे पदाधिकारी आंदोलनात सहभागी होणार होते. मात्र दोन दिवसापूर्वी त्यांच्या अपघात झाल्याने ते आंदोलनात सहभाग घेऊ शकले नाही.
