भंडारा पत्रिका/वार्ताहर सिल्ली : सिल्ली येथील रहिवासी विलास चोपकर यांचे वडिल पिसाराम शंकर चोपकर यांचे वयाच्या ६८ व्या वर्षी रविवार दि. ३ सप्टेंबर रोजी निधन झाले. निधनानंतर चोपकर कुटूंबाने आपल्यावरील दुख:चा डोंगर बाजूला सारुन, त्यांच्या पत्नी शोभा पिसाराम चोपकर यांच्या पुढाकाराने नेत्रहिनांना या जगातील सौंदर्य पाहता यावे या उदात्त भावनेने त्यांच्या नेत्रदानाचा निर्णय घेतला. नेत्रदान हे महान दान मानले जाते. शहरात मरणोत्तर नेत्रदानात आणखी एक नाव जोडले गेले आहे. विलास चोपकर यांचे वडिल स्वर्गीय पिसाराम शंकर चोपकर यांचे रविवारी रात्री ८ वाजता दरम्यान निधन झाल्यानंतर नेत्रदान करण्यात आले. यामुळे आता पिसाराम चोपकर यांनाही मृत्यूनंतरचे जग पाहता येणार आहे. भंडारा तालुक्यातील सिल्ली येथील रहिवासी पिसराम चोपकर यांचे रविवारी रात्री ८ वाजता दरम्यान आजारपणामुळे निधनझाले.
रविवारी रात्रीच भ्रमणध्वनीवरुन जिल्हा सामान्य रुग्णलायातील शल्य चिकित्सक यांना कळविण्यात आले की, पिसाराम चोपकर यांचे निधन झाले असून त्यांचे नेत्र दान करायचे आहे. यावर त्यांनी नेत्रदान विभागाच्या समुपदेशक सोनाली लांबट यांना सांगितल्यावर लांबट यांनी त्यांच्या मार्गदर्शनात नेत्र विभागाच्या टेक्नेशियन सुचिता श्रीपाद व चमुला पाठवून पिसाराम चोपकर यांचे नेत्रदान केले. स्वर्गीय पिसाराम चोपकर यांच्या पश्चात पत्नी, १ मुलगा, ३ मुली, सुन व नातवंडे असा परिवार आहे. त्यांच्या पार्थीवावर स्थानिक स्मशानभूमीत सोमवारी दुपारी १२ वाजता अंत्यसंस्कार करण्यात आले. त्यांचा मुलगा विलास चोपकर हे जिल्हा सामान्य रुग्णालयात कार्यरत आहेत. स्वर्गीय पिसाराम चोपकर यांच्या निधनाने कुटुंबावर शोककळा पसरली आहे. त्याचबरोबर त्यांच्या या महान देणगीबद्दल कुटुंबीयांना अभिमान वाटत आहे. लोकांचे अंधत्व पाहून त्यांना खूप वाईट वाटायचे असे नातेवाईकांनी सांगितले.
