भंडारा पत्रिका / प्रतिनिधी लाखनी :- अवैधरित्या विना रॉयल्टी ने रेती वाहतूक करतांना ३ ट्रॅक्टर मिळून आल्याने चालक मालकांवर गुन्हा दाखल करण्यात आला असून त्यांचेकडून १५ लाख ०९ हजार रुपयाचा मुद्देमाल जप्त करण्यात आला आहे. जयंता परसराम हटवार वय २५ रा. संजय नगर टोली, पालांदूर, चेतन फागुजी ठाकरे वय २४ रा. खैरी /कवडसी व महेंद्र शिवराम शहारे वय २८ रा. संजय नगर टोली, पालांदूर अशी आरोपींची नावे आहेत. या कारवाईने अवैध गौण खानिज व्यवसायिकांचे धाबे दणाणले आहेत. लाखनी पोलीस स्टेशन चे पोलीस हवालदार केशव नागोस, पो. शि. प्रशांत धकाते व पोलीस शिपाई स्वप्नील कहालकर यांची रात्र गस्त ड्युटी असल्याने पोलीस स्टेशन हद्दीत पेट्रोलिंग सुरु होती.
मध्यरात्री १२.३० वाजताच्या सुमारास चुलबंध रेती घाटातून अवैध रेती वाहतूक होत असल्याच्या गुप्त माहिती वरून लाखनी पोलिसांचे पेट्रोलिंग वर असलेल्या पथकाला दिघोरी /नान्होरी गावाजवळील डांबरी रस्त्यावर ३ ट्रॅक्टर एकामागे येत असताना दिसले . त्यांना पथकातील पोलिसांनी थांबवून पाहणी केली तेव्हा त्यांना त्यात रेती भरलेली आढळली चालकांना रॉयल्टी विषयी विचारले असता त्याच्याजवळ रॉयल्टी,पास , परवाना आढळून आले नाही. यात पोलिसांनी ३ ट्रक्टर ट्राली सह विना क्रमांकाचे जप्त करून पोलिस स्टेशन ला आणण्यात आले. यात १५ लाख ९ हजार रुपयाचा मुद्देमाल मिळून आल्याने पोलिस शिपाई प्रशांत धकाते यांचे फिर्यादीवरून लाखनी पोलिसांनी अपराध क्रमांक ३३९ /२०२३ कलम ३७९, भादवि अन्वये तिन्ही ट्रॅक्टर चे चालक यांचेवर गुन्हा दाखल केला आहे. पोलिस निरीक्षक मिलिंद तायडे यांचे मार्गदर्शनात पोलिस हवालदार केशव नागोसे पुढील तपास करीत आहेत. या कारवाईने गौण खनिज माफियांचे धाबे दणाणले आहेत.