भंडारा पत्रिका / प्रतिनिधी गोंदिया : जिल्हा पोलिस अधीक्षक निखिल पिंगळे व जिल्हाधिकारी चिन्मय गोतमारे यांच्यासमोर २२ सप्टेंबर रोजी १९ लाख रुपयांचे बक्षीस असलेल्या जहाल माओवादी दाम्पत्याने महाराष्ट्र शासनाच्या आत्मसमर्पण योजनेने प्रभावित होऊन आत्मसमर्पण केले. लच्छू ऊर्फ लच्छन ऊर्फ सुकराम सोमारू कुमेटी (३९ व कमला ऊर्फ गौरी ऊर्फ मेहत्री सामसाय हलामी (३६ असे त्यांचे नावे आहेत. माओवाद्यांच्या विलय सप्ताहाच्या पार्श्वभूमीवर माओवादी दाम्पत्याने गोंदिया जिल्हा पोलिस अधीक्षक तसेच जिल्हाधिकारी यांच्या अध्यक्षतेखालील समितीसमक्ष आत्मसमर्पण केले. लच्छू ऊर्फ लच्छन ऊर्फ सुकराम सोमारु कुमेटी याच्या १६ लाखाचे व कमला ऊर्फ गौरी ऊर्फ मेहत्री सामसांय हलामी हिच्यावर ३ लाख रुपये बक्षीस जाहीर करण्यात आले होते.
लच्छु उर्फ लच्छन ऊर्फ सुकराम सोमारू कुमेटी हा सन १९९९ मध्ये माओवादी संघटनेमध्ये भरती झाला असून त्याने अबुझमाडमध्ये प्रशिक्षण घेवून स्पेशल झोनल कमेटी मेंबर शेखर ऊर्फ सायण्णा याचा अंगरक्षक म्हणून काम केले. तसेच केशकाल दलम, कोंडगाव दलम (छट्टीसगड), कोरची, खोब्रामेंढा (गडचिरोली) व गोंदिया येथील देवरी दलममध्ये (महाराष्ट्र) उपकमांडर पदावर काम केले आहे. त्याने नक्षल दलममध्ये केलेले काम पाहून त्यास देवरी दलमकचे कमांडर पद देण्यात आले होते.
त्याच्याविरुद्ध जिल्ह्यात चकमकीचे व जाळपोळीचे ६ गुन्हे नोंद आहेत. तर कमला ऊर्फ गौरी ऊर्फ मेहत्री सामसाय हलामी ही सन २००१ मध्ये खोब्रामेंढा दलममध्ये भरती झाली असून त्यानंतर तिला उत्तर बस्तर व बालाघाटच्या (मध्यप्रदेश) जंगलात पाठवून प्रशिक्षण देण्यात आले. प्र-ि शक्षण पूर्ण केल्यानंतर तिने दलम सदस्य म्हणून कोरची, खोब्रामेंढा, चारभट्टी दलम, प्लाटून-ए(गडचिरोली), गोंदिया येथील देवरी दलम मध्ये काम केले आहे. तिच्यावर गोंदिया जिल्ह्यात मारहाण, पोलिस पार्टीवर फायरिंग, जाळपोळ असे ८ गुन्हे दाखल आहेत. प्रकृती खालावल्याने कमलावर सुरत येथे उपचार करण्यात आले. मात्र त्यानंतरही प्रकृती बरी राहत नसल्याने दमल सोडले. तसेच नक्षल संघटनेत जीवन अंधकारमय व धोकादायक असल्याने तसेच शासनाच्या आत्मसमर्पण योजनेने प्रभावित होऊन गोंदिया पोलिसासमोर आत्मसमर्पण केल्याचे लच्छू व कमलाने सांगितले.
