भंडारा पत्रिका / प्रतिनिधी सिहोरा : तुमसर तालुक्यातील भंडारा-बालाघाट राज्यमार्गा वरील बिनाखी येथे आज दिनांक २३ मे रोज गुरुवारला सकाळी ७ वाजेच्या सुमारास ट्रक व पीकअप वाहनाच्या धडकेत ट्रक चालक गंभीर जखमी झाल्याची घटना घडली. सविस्तर वृत्त असे की, संजय भवरे रा. बालाघाट (मध्यप्रदेश) असे जखमी ट्रकचालकाचे नाव असून तो आपल्या ट्रक क्र. सी.जी.०४ / जेए ७२३९ मध्ये तांदूळ भरून नागपूरकडून बालाघाटकडे जात असता विरुद्ध दिशेने येणाºया विजय राऊत रा. पंचमुखी वार्ड बालाघाट हा आपल्या पिकअप वाहन क्रमांक एम.एच. ४० / बिएल ५८८१ या वाहनात भाजीपाला भरून बालाघाट कडून भंडाराकडे जात असता ट्रक व पिकअप वाहनाची समोरासमोर धडक झाली.
सदर धडक इतकी भीषण होती की, ट्रक हा रस्त्याच्या कडेला शेतात पलटी झाला. यात ट्रकच्या दर्शनी भागाचा अक्षरश: चेंदामेंदा झाला. या घटनेत कोणतीही जीवित हानी झाली नसली तरी ट्रक चालकाच्या पायाला गंभीर दुखापत झाली आहे. यावेळी नागरिकांनी जखमी ट्रक चालकाला उपचारार्थ ग्रामीण रुग्णालय सिहोरा येथे दाखल केले. दरम्यान सदर घटनेची माहिती सिहोरा पोलिसांना मिळताच सिहोरा पोलिसांनी तत्काळ घटनास्थळ गाठून घटनेचा पंचनामा केला. झालेल्या घटनेचा पुढील तपास सिहोराचे ठाणेदार नितीन मदनकर यांच्या मार्गदर्शनात पोलीस हवा. मनोज इळपाते करीत आहेत.
