भंडारा पत्रिका/प्रतिनिधी गोंदिया : गोंदिया जिल्ह्यातील गंगाझरी पोलीस ठाणे अंतर्गत येत असलेल्या सेजगाव ते नहरटोला मार्गावर काचेवानी येथील आदिशक्ती शाळेतील विद्यार्थ्यांना घेऊन जाणारी स्कुलव्हॅन क्रमांक एम.एच.३५- ए.जी. १७१५ ही अचानक पलटल्याने या स्कुलव्हॅन मध्ये त्यावेळी सवार असलेले १३ विद्यार्थी जखमी झाल्याची घटना आज गुरूवार ३० जानेवारीला सकाळी १०.३० वाजेच्या सुमारास घडली. घटनेची माहिती मिळतात घटनास्थळी गंगाझरी पोलीस दाखल झाली. शाळकरी विद्यार्थ्यांची स्कुलव्हॅन ला निष्काळजीपणाने चालवीत असल्याबद्दल चालक सुनील रणजित श्रीबंशी (२४) रा. पालडोंगरी याला ताब्यात घेण्यात आले आहे. आपल्या चिमुकल्याला घेऊन जाणारी स्कूलबसच्या अपघात झालेला आहे हे कळताच पालक वर्ग पण घटनास्थळी दाखल झाले. व आपापल्या पालकांना जवळील रुग्णालयात दाखल करून त्यांच्यावर उपचार करून घेतले.
तर काही जखमी विद्यार्थ्यांना उपचाराकरीता प्राथमिक आरोग्य केंद्र एकोडी या रुग्णालयात हलविण्यात आले. या अपघातात अक्षित जितेश अंबुले (४) रा. बिविटोला, सानवी जितेश अंबुले (७) रा. बिविटोला, तोषांत जागेश्वर रहांगडाले (६) रा.सोनेगाव, गुंजन अरविंद रहांगडाले (८) सोनेगाव, दाक्षी गोविंद कुमार रहांगडाले रा. सोनेगाव, शिवन्या अजयकुमार भगत रा. सोनेगाव, क्रिश कृष्णा रहांगडाले डीबेटोला, रेखा धनंजय भगत सोनेगाव, शिवम मेश्राम सोनेगाव, दिनल सुभाष रहांगडाले, लक्ष कृष्णकुमार पटले रा. सोनेगाव, आदी अरुण बोपचे आणि भावी भरतलाल रहांगडाले अशी एकूण १३ शाळकरी विद्यार्थ्यांची रुग्णालयात उपचार करून सुट्टी देण्यात आले आहे.
गंगाझरी पोलिसांनी दिलेल्या माहितीनुसार गुरुवारी सकाळच्यासुमारास आदिशक्ती पब्लिक स्कूल काचेवानी, तालुका तिरोडा येथील स्कूल बस आपल्या शाळेतील विद्यार्थ्यांना घरून शाळेत घेऊन येत असताना सेजगाव-नहरटोला जवळ स्कुलव्हॅनला अपघात झाला. यात बस मध्ये उपस्थित असलेले १३ विद्यार्थी जखमी झाले होते त्यांना उपचार केल्यानंतर सुट्टी देण्यात आलेली आहे. शाळेतील पालकांच्या तक्रारीवरून वाहन चालक सुनील श्रीबंशी याला गंगाझरी पोलिसांनी ताब्यात घेतले आहे. पुढील तपास गंगाझरी ठाण्याचे पोलीस निरीक्षक वर्मा यांच्या मार्गदर्शनात हवालदार सुभाष हिवरे, राकेश भुरे हे करीत आहेत.
