भंडारा पत्रिका/प्रतिनिधी सिहोरा – महसूल विभागाच्या धाड सत्रानंतरही सिहोरा परिसरात अवैध मुरूम उत्खनन धडाक्यात सुरू असल्याच्या वृत्ताने चांगलीच खडबड उडविली आहे. अवैद्य मुरूम उत्खननामुळे शासनाचा लाखो रुपयाचा महसूल बुडत आहे. याला अभय कुणाचे असा प्रश्न उपस्थित होत आहे.अवैध मुरूम उत्खनन धडाक्यात सुरू असल्याची कुणकुण महसूल विभागाच्या अधिकाºयांना लागताच त्यांनी सापडा रचला व महसूल पथकाच्या अधिकाºयांनी अवैध मुरूम वाहतूक करणारा ट्रॅक्टर (ट्रॉलीवर मंगल नाव असलेला) व चालक नरेंद्र पंधरे धनेगाव याला ताब्यात घेण्यात आले . व मुरुमासह ट्रॅक्टर सिहोरापोलिसांच्या स्वाधीन करण्यात आले होते.चालक नरेंद्र पंधरे यांनी दिलेल्या माहिती प्रमाणे बिना क्रमांकाचा ट्रॅक्टर हा धनेगाव येथील मंगल बिसने यांचा असल्याचे समजते. सदरची कारवाई महसूल पथकाचे राकेश बर्वेकर, शांतनु तोरणकर, अनिल बोरले व निखिल अर्चे यांचे वतीने तुमसरचे तहसीलदार मोहन टिकले यांच्या मार्गदर्शनाखाली ३१ जानेवारी रोजी दुपारी २.३० चे सुमारास धनेगाव परिसरात करण्यात आली होती .
महसूल विभागाने कारवाई केल्यानंतरही सिहोरा , सोनेगाव व धनेगावच्या मध्य भागी आणी चांदपूर जलाशयाच्या कालव्या लगत असलेल्या शेत शिवारातून अवैध मुरूम उत्खनन सुरूच असल्याचे वृत्त आहे. सदर मुरूम हा पिपरीचुन्नी तसेच ठिकठिकाणी सुरू असलेल्या रोडवर कोट्यावधीचे मुरूम बिना रॉयल्टी चोरी करून सोडले जात आहे. यात शासनाचा लाखो रुपयांचा महसूल सुद्धा बुडत आहे. या प्रकरणात अभय कुणाचा असा प्रश्न उपस्थित होत आहे. महसूल विभागाने या प्रकरणात दखल घेण्याची गरज आहे.महसूल विभागाचे अधिकारी व मुरूम माफिया यांच्यात पाणी तर मुरत नाहीना अशीही चर्चा जोर धरत आहे.
